當一包尿片用剩最後一塊；
當一件衣服褲管又短了一截；
當一抱上手發覺又重了零點零幾幾磅；

當你咀上噴著口水花；
當你咀巴胡言亂語叫爸媽；
當你手仔亂抓亂碰卻拍手；
又當你手仔上搖下擺卻請請；
當你在床仔碌上碌下要轉身；
又當你在床仔抓著抓著要企身；

啊妹妹呀妹妹，怎樣知道你大了？
廿年卅年後今天，
你說明天嫁人了，我就知道你大了！

哥哥四十個月大，仍然咬字不正．

輝叔叔給他一個竹蜻蜓，
我：子靛，多謝輝叔叔啦！
靛：多謝飛叔叔．
我：唔係飛，係輝．
靛：（努力地，再慢慢地）多謝飛叔叔！
我：哈哈！

放學後，
靛：媽咪，班裏面都有個叫芊芊架？
我：係咩，咁佢係邊組架？
靛：佢係獅子組架！
我：哦係呀．
一會兒後．
我：咁你係咩組架
靛：麵包組．
我：哦！

隔了數天，
我：（終於忍不住好奇問）子靛，你係麵包組，點會芊芊係獅子組呢？獅子同麵包有什麼關係呢？
靛：…..（都唔知你問乜）
我：（想了又想）呀，我知啦，芊芊唔係獅子組，係芝士組，係咪呀？
靛：（理所當然地）係呀！
我：我明啦！！！！（哈哈，子靛把芝士讀成獅子，哈哈！）

八個月的你，
只要媽媽在身邊，靜靜地玩；
只要媽媽一離開，淒淒然哭；
只要媽媽又回來，悄悄又笑．

八個月的你，
只要哥哥跟你跑，咔咔咔笑；
只要哥哥peekapoo，彎彎彎腰；
只要哥哥嘩嘩嘩，拍拍拍手．

八個月的你，
只要爸爸彈結他，靜靜聽著；
只要爸爸唱啦啦，眼巴巴看；
只要爸爸抱入懷，徐徐挨著．

八個月的你，
又食粥仔，又食提子，又食包包，不過，最愛媽媽奶．
又愛媽媽，又愛爸爸，又愛pooh pooh，不過，最愛哥哥笑．
又愛扭抱，又愛扭計，又愛流口水，不過，最愛半夜四時吵醒你．
又愛坐bouncer ，又愛坐學行車，又愛坐搖馬，不過，最怕坐高椅．

八個月的你，四十一個月的哥哥，三百幾個月的我，四百幾個月的爹爹，
最愛床上鑽，
一起講故事，一起唱支歌，一家笑哈哈，彎了眼睛彎了咀巴，再彎腰，然後笑笑笑笑笑．
一笑到天明！

一晚．又是睡前．
靛：「媽咪牙，你係咪好錫我架？」
我：「你話呢？」
靛：（想了一想）「係呀。」
然後，你用雙手圈住我的脖子，說：「我都好錫你架！」

芊芊今天七個月大，時間過得真快！
接近六個月的時候，芊芊初嘗第一口糊仔，細細啖，細細啖，很有儀態；
糊仔份量隨著年日增至半碗，每次食到半飽，你便會把糊仔’poo’ 出來，有時甚至噴在我的面上，又會噴在自己面上，弄出一個花面貓來，叫我哭笑不得．
初嘗奶樽，你十分抗拒，四安的奶花了一小時才喝完，還要邊哭邊飲，你在抗議著，為何媽媽不見了？
及後你願意用奶樽，又只肯用那個矽膠質料的奶嘴，其它的一概不喝，最多罷喝！
多麼有性格，不肯妥協，像我！
現在食粥仔了，紅蘿蔔，豆腐，菠菜，粟米，蛋黃，魚肉，豬肉，都一一嘗過了，
不過，任粥仔煮得再香，你卻只肯吃半碗，準確一點來說，你只肯吃十分鐘，
十分鐘過後，你便哄過來我的胸膛，不是要用我的衣服來抺嘴，而是；要－吃－奶－！
所以，你的午餐是半碗粥，再飲奶；晚餐又是半碗粥，又飲奶；
你真有你的，，性格！！

你很像很懂事似的，有次抱你入哥哥房，見到哥哥在睡覺，你ah..ah.. ah..ah.. 似是要叫他起來跟你玩；你最愛的遊戲，便是跟哥哥玩peekapoo ，哥哥把紗巾蓋著你的頭，然後你慢慢地自己揭開紗巾，一見到哥哥那張臉，你便卡卡卡卡大笑了；哥哥駕車馳騁於走廊間，我抱你跟著哥哥跑，你又－－卡－－一聲，笑了，似是真的在跟哥哥追逐一樣，我在想，你第一個會說的字，會否是哥而不是媽呢？

你很大力啊，握在你手的東西，要是要拿走，非要大力一點不可；你最近愛玩的玩具，竟然是哥哥的豬仔車，有時哥哥撒野不讓你玩，你都要拿來玩；看著你倆一起玩耍，我覺得－－好熱鬧，這間屋子，多了你們兩個活寶貝，好熱鬧！

我培養了一個新習慣，就是替你揀衫，每次把你的衫一件一件拿出來，這件襯那件，粉紅色上衣襯紫色褲仔，或者黃色全身body 再加上粉紅色外套，這把你穿得整整齊齊，你便會散發小女孩的溫柔，呵，我酷愛你的媚態．

睡前，是子靛吐真言的時候．

靛：我同你做朋友丫！
我：好呀，咁你仲有同邊個做朋友呀？
靛：瑤瑤啦，約琳啦！
我：哦！（全是女仔？！）咁坤坤呢？
靛：坤坤幾日都同瑤瑤坐！（即係唔同我坐）
我：哦，咁佢都係朋友黎架麻，仲有晴晴啦，朗朗啦，藍藍啦，依珩啦，都係朋友黎架麻！
靛：佢地唔係K1 (校車）架噃！

這個話題完了，隔了一會，又轉話題．

我：你半夜可唔可以唔好走過來爹地媽咪床度瞓呢？
靛：（斬釘截鐵）唔可以！
我：咁你過來會吵醒爹地同妹妹喎，咁你可唔可以唔過來呢
靛：（斬釘截鐵）唔可以！
我：不如咁啦，如果你今晚半夜睡醒唔過來，聽朝早我給你一粒KAWAI 糖！（威迫利誘）
靛：（瞪眼，豎眉，口水流地）好呀！

這個話題完了，隔了一會，又轉話題．

我：咁你今日係學校玩了什麼呀？
靛：（想了一會）我好眼瞓呀，你唔好同我講野啦！

準備入營前：
靛：我地去邊呀？
我：我地去渡假村瞓一晚？
靛：嗰度有咩架？
我：有山，有海，有公園，又有得食，有床瞓！
靛：有冇電腦架？
我：（怔一怔）
靛：（續說）你平時要用電腦架麻！

入營後：
靛：呢間係咩酒店黎架？
我：呢度唔係酒店，係渡假村．
靛：我想張呢度搬返屋企呀，呢度有爹地一張床，媽咪一張床，子靛一張床，妹妹一張床，咁咪得囉！

自從生了子靛後，我也沒有在退修營中留宿，今年破天荒總動員一家四口一去入營，在寒冷天氣下，營屋比屋外溫暖，廁所整潔，房門偌大，晚上睡得甚至比在家好，行李共用了一個喼，一個旅行袋，一個手挽袋，妹妹穿的睡袋也帶了兩個，一個室內一個室外，雖然勞動多，不過偶然外出過一晚夜，對子靛來說，很有新鮮感．

妹妹已經六個半月大，最喜歡見到的人，除了我，還有哥哥，每次哥哥放學回來，她總要笑，哥哥跟她玩peekapoo，她笑到合不攏嘴，有趟哥哥睡了，我抱她進哥哥房拿衣服，她看見哥哥，口中念念有詞：hmm..hmm.. 邊說邊向哥哥處伸出頭仔，像要叫哥哥起床跟他玩；哥哥也很錫妹妹，依然很願意替妹妹掉尿片，兩兄妹將來感情應該不俗．

哥哥呢？最近開始了每日一份功課，都是線條練習或者填顏色，他很記得老師的話，午飯時會把學校的事逐件數算，那個琳琳，還有謙謙，去過音樂室玩馬鈴，又去過操場玩車，我統統都沒有見過，卻被他這樣覆述而彷如身歷其景．

有一次，接他校車時見他戴了個口罩，就是那叫了他很多遍都不依的星星口罩；
我：你怎麼戴了口罩？
靛：我咳麻．
我：誰叫你戴口罩？（我以為是老師）
靛：係泥深言．佢話我咳，叫我戴口罩．
我：（心想）哼，我叫你不依，這個黎小姐叫你卻做足了，你將來可會聽我這個娘親的話呢？！
（註！這個泥心言大慨是校車同學，不是同班的）

妹妹開始食糊仔了，屎臭得很！食的時候要玩下玩下，飽了卻要poo 出來，不過體重卻在增長中，現在還未純熟地轉身，加上現在衫很厚，著到一個波似的，樣子則越來越像哥哥．

為慶祝芊芊半歲生日，我們往九龍公園暢玩一番，終於捕足到兩兄妹一齊玩的一刻．

芊芊還未能坐

情深一抱

只得6.37kg，但長得高

芊芊，我愛你！

妹妹在一個廁所洗澡，照舊望向沒有人的走廊，要搜索哥哥的踪影．
我幫她一把：哥哥，妹妹找你呀！
（一秒的停頓，一把聲音從另一個廁所傳來）
哥哥：（變了聲）（用力地）我．疴．緊　poo poo 呀！！！

子靛上學不足兩個月，老師教背主禱文．
靛：哦們日用的忍（飲）食，更（今）日賜給哦們，免我們的制，如同我們免了人的制…
我：唔係制，係債，免．了．人．的．債（說時慢一點，逐個字逐個字讀）
靛：（笑）免．了．人．的．制…
我：唔係制，係債，免．了．人．的．債（說時再慢一點）
靛：（又笑）免．了．人．的．制，如同哦們…